ཁྲི་འདུ། བསྟན་ཆོད།
བོད་ནི་རྒྱ་གར་དང་དགྱ་ནག་སོགས་དང་འདྲ་བ་ལོ་ངོ་སྟོང་ཕྲག་དུ་མའི་གོང་རོལ་དུ་བྱུང་བའི་མི་རིགས་ཤིག་ཡིན་ངེས་ན་འང་། ནང་ཆོས་ཀྱི་བཤད་ཡམ་ལས་འཕྲོས་པའི་སྐད་ཆ་འདི་ལྟར་ཞིག་ཡོད་དེ། རྒྱ་གར་ཆོས་ཀྱི་རྒྱལ་ཁམས་དང་དགྱ་ནག་རྩིས་ཀྱི་རྒྱལ་ཁམས་ཞེས་དེ་དག་ལ་ཐུན་མིན་གྱི་རིག་གཞུང་རེ་ཡོད་པར་བཤད་ཀྱི་ཡོད་ཅིང་།
བོད་ཡུལ་ནི་སྲོང་བཙན་གྱི་གོང་དུ་ལོ་ངོ་བརྒྱ་སྟོང་དུ་མའི་རིང་ལ་རིག་གཞུང་སོགས་ཅི་ཡང་མེད་པའི་མུན་པའི་གླིང་ཞིག་ཏུ་ངོས་འཛིན་བྱེད་སྲོལ་ཡོད། འདི་ནི་གནས་ལུགས་དང་དངོས་འགལ་དུ་སོང་བའི་ཆད་ལྟ་ཞིག་སྟེ། ཡབ་མེས་གོང་མ་རྣམ་ལ་བརྙས་བཅོས་དང་འདས་པའི་ལོ་རྒྱུས་དེ་དག་ནག་གསུབ་གཏོང་བྱེད་ཅིག་ཏུ་ངེས་སོ།། དོན་ལ་སྲོང་བཙན་གྱི་གོང་དེར་བོད་ཀྱི་ཆབ་སྲིད་ནི་སྒྲུང་ལྡེའུ་བོན་གསུམ་གྱིས་བསྐྱངས་པ་ཞིག་ཡིན་ཕྱིར་རིག་གཞུང་མེད་པར་མི་སྲིད་ཅིང་། ནང་ཆོས་མེད་པ་དེ་ཙམ་གྱིས་རིག་གཞུང་མེད་པར་སྨྲ་བ་ཡིན་ན། དེ་ནི་མཐུན་ཕྱོགས་ལ་མཐོང་བ་ཙམ་གྱི་སྐད་ཆ་ཞིག་ལས་བསྒྲུབ་བྱའི་ཆོས་དང་སྒྲུབ་བྱེད་ལ་མེད་ན་མི་འབྱུང་པའི་འབྲེལ་བ་ཞིག་ལར་ནས་གྲུབ་ཀྱི་མི་འདུག་གོ།
བོད་ཡུལ་ནི་སྲོང་བཙན་གྱི་གོང་དུ་ལོ་ངོ་བརྒྱ་སྟོང་དུ་མའི་རིང་ལ་རིག་གཞུང་སོགས་ཅི་ཡང་མེད་པའི་མུན་པའི་གླིང་ཞིག་ཏུ་ངོས་འཛིན་བྱེད་སྲོལ་ཡོད། འདི་ནི་གནས་ལུགས་དང་དངོས་འགལ་དུ་སོང་བའི་ཆད་ལྟ་ཞིག་སྟེ། ཡབ་མེས་གོང་མ་རྣམ་ལ་བརྙས་བཅོས་དང་འདས་པའི་ལོ་རྒྱུས་དེ་དག་ནག་གསུབ་གཏོང་བྱེད་ཅིག་ཏུ་ངེས་སོ།། དོན་ལ་སྲོང་བཙན་གྱི་གོང་དེར་བོད་ཀྱི་ཆབ་སྲིད་ནི་སྒྲུང་ལྡེའུ་བོན་གསུམ་གྱིས་བསྐྱངས་པ་ཞིག་ཡིན་ཕྱིར་རིག་གཞུང་མེད་པར་མི་སྲིད་ཅིང་། ནང་ཆོས་མེད་པ་དེ་ཙམ་གྱིས་རིག་གཞུང་མེད་པར་སྨྲ་བ་ཡིན་ན། དེ་ནི་མཐུན་ཕྱོགས་ལ་མཐོང་བ་ཙམ་གྱི་སྐད་ཆ་ཞིག་ལས་བསྒྲུབ་བྱའི་ཆོས་དང་སྒྲུབ་བྱེད་ལ་མེད་ན་མི་འབྱུང་པའི་འབྲེལ་བ་ཞིག་ལར་ནས་གྲུབ་ཀྱི་མི་འདུག་གོ།
སྲོང་བཙན་གྱི་གོང་དེར་བོད་ཀྱི་ཆབ་སྲིད་དེ་ཉིད་སྒྲུང་ལྡེའུ་བོན་གསུམ་གྱིས་བསྐྱངས་ཞེས་པའི་སྒྲུང་གི་དོན་ནི་མཁས་དབང་ནམ་མཁའ་ནོར་བུ་ཡིས་གསུངས་པ་བཞིན་གནའ་རབས་ཀྱི་བྱུང་བ་བརྗོད་པའི་གཏམ་ཅི་རིགས་ལ་གོ་དགོས། དེས་ན་གནའ་རབས་ཀྱི་བྱུང་བ་བརྗོད་པའི་ལོ་རྒྱུས་ལ་སྒྲུང་གིས་ཁྱབ་བམ་ཞེ་ན་དེ་ནི་མ་ཡིན་ཏེ། ལོ་རྒྱུས་ཞེས་པ་ནི་དོན་དངོས་ཀྱི་བྱུང་བ་ལ་བྱ་ཡི་སྒྲུང་ནི་སྔར་གྱི་བྱུང་བ་བརྗོད་པ་གང་ཞིག་ལ་རབ་བཏགས་ཀྱི་ཆ་དང་ལྡན་པ་ཞིག་ལ་གོ་དགོས་སོ།།
ལྡེའུའི་དོན་ནི་ལ་ཤས་ཀྱིས་མིའི་བསམ་མནོའི་རྩལ་ཁ་འདོན་བྱེད་ཀྱི་ནུས་པ་དང་ལྡན་པ་ཞིག་སྟེ”ཁོངས”ཀྱི་དོན་དུ་འགྲེལ་འདུག་ལ། མཁས་དབང་ནམ་ནོར་གྱིས་ས་སྐྱ་པཎྜི་ཏའི་ལེགས་བཤད་དུ་འཁོད་པའི”རིག་པ་ནང་པར་འཆི་ཡང་སློབ”ཅེས་པའི་སྐབས་ཀྱི་རིག་པའི་དོན་ཏེ། ལྡེའུ་འཕྲུལ་གྱི་མོ་ལ་བརྟེན་ནས་ལྐོག་གྱུརད་ཀྱི་གནས་ཚུལ་གསལ་པོར་རྟོགས་པའི་ཐུབ་པའི་རིག་པའི་དོན་དུ་འགྲེལ་ཡོད། ཨ་ལགས་དུང་དཀར་ཚང་གིས་ཀྱང་ལྡེའུ་ནི་ཚིག་ཉུང་ལ་ནང་དོན་ངོ་མཚར་ལ་རྒོད་བྲོ་བ་དང་། བསམ་དོན་གྱི་དངོས་པོ་ངོ་མ་སྦས་ནས་དེ་སྒྲིབ་བྱེད་ཀྱི་དངོས་པོ་གཟུགས་དང་སྒྲ་དབྱིབས་སོགས་འདྲ་ཆོས་སྦྱར་ནས་མི་རྣམས་བློ་སྒོ་འབྱེད་ཐུབ་པའི་རིག་རྩལ་གྱི་རིགས་ཤིག་སྟེ། དེ་ལ་བརྟེན་ནས་བྱིས་པ་རྣམས་རང་བྱུང་གི་ཚན་རིག་ངོ་སྤྲོད་བྱེད་ཆོག་ཅེས་དང་སྙན་ངག་ལེའུ་གསུམ་པའི་སྐབས་ཀྱི་གབ་ཚིག་གི་སྐབས་སུ་གསལ་ཞེས་པ་སོགས་ལ་བལྟས་ཚེ་གནད་ཅིག་ཏུ་བབས་འདུག་སྟེ། དགུ་སྤུན་གྱིས་ལྡེའུ་ནི་གསང་བའི་གནད་ཅིག་ཡིན་པ་འདྲ་ཞེས་ལབ་པ་བཞིན། ལྡེའུ་ཞེས་པ་ནི་ལྐོག་གྱུར་གྱི་གནས་ཚུལ་དེ་དག་གབ་ཚིག་གི་ཚུལ་གྱིས་བརྗོད་པའི་བློ་འབྱེད་ཀྱི་རིག་པ་ཞིག་ལ་གོ་དགོས་སོ།།
མཁས་དབང་ནམ་ནོར་སོགས་ཀྱིས་བོན་ཞེས་པ་ནི་བཟླས་པ་འམ་གྱེར་བའི་དོན་ཏེ་སྔགས་དང་ཆོ་ག་རྣམས་བགྲང་པ་འམ་འདོན་པའི་དོན་དུ་འགྲེལ་ཡོད། བན་བོན་གྱི་ཕྱོགས་འབྲང་མེད་པའི་བོད་ཀྱི་ལོ་རྒྱུས་སྨྲ་བ་མང་དག་གིས་ད་ལྟའི་བོད་ལུགས་ཀྱི་ཆོ་ག་ཕལ་མོ་ཆེར་ནི་བོན་ལས་བྱུང་བ་རུ་བཤད་ཅིང་། ཟས་ཀྱིས་བཟོས་པའི་གཏོར་མ་ཞེས་པ་ཞིག་མཆོད་སྦྱིན་བྱེད་པའི་སྲོལ་ནི་ཆོས་མགོ་རྒྱ་གར་ནའང་མེད་ཅེས་སྐུ་ཞབས་ཞོགས་དུང་ཀྱི་དཔྱོད་ཤེས་རྒྱང་འབོད་དུ་གསལ་བ་ལྟར་འདི་དག་ནི་ཧ་ལམ་བོན་ལས་བྱུང་བ་ཞིག་ཡིན་འདུག་ཕྱིར། བོན་ཞེས་པ་ནི་སྔགས་དང་ཆོ་ག་རྣམས་བཟླས་པའམ་གྱེར་བའི་དོན་དུ་འགྲེལ་ན་ཤིན་ཏུ་འགྲེལ་ཆེ་བ་རུ་སྣང་། ད་དུང་འགྲེལ་ཚུལ་གཞན་ཞིག་ཀྱང་ཡོད་འདུག་སྟེ་ཚན་མའི་གཞུང་ལུགས་སུ། སྒྲ་ཆོས་ཅན། མི་རྟག་སྟེ། བྱས་པ་ཡིན་པའི་ཕྱིར་ཞེས་པའི་སྐབས་ཀྱི་ཆོས་ཅན་གྱི་བརྡ་ཆད་དུ། སྒྲ་བོན་ཅན། མི་རྟག་སྟེ། བྱས་པ་ཡིན་པའི་ཕྱིར་ཞེས་བོན་པོ་རྣམས་པས་རྩོད་གཞི་ཆོས་ཅན་གྱི་དོད་དུ་རྩོད་གཞི་བོན་ཅན་ཞེས་སྦྱོར་ཚུལ་ལ་ཞིབ་ན། བོན་ཞེས་པ་ནི་ཆོས་ཀྱི་དོན་དུ་འང་འགྲེལ་ཚུལ་ཡོད་སྐད་འདུག བོན་གྱི་ཆོས་ལུགས་དར་བ་དང་མཉམ་དུ་བོན་གྱི་ཆོས་ལུགས་ཀྱི་མིང་དུ་བོན་ཞེས་པའི་ཐ་སྙད་འདི་བྱུང་ཡོད་མེད་ནི་ཧ་ཅང་གི་དཔྱད་གཞི་ཞིག་ཏུ་གྱུརད་ཡོད། ལོ་རྒྱུས་སྨྲ་བའི་དབང་པོ་དགེན་མཁར་རྨེའུ་བསམ་གཏན་ལགས་ཀྱིས་གཡུང་དྲུང་གི་བོན་ཞེས་པའི་ཐ་སྙད་དང་བོན་གྱི་འབྱུང་ཁུངས་སུ་གྲགས་པའི་འོལ་མོ་ལུང་རིང་གི་ཐ་སྙད་དག་ནི་དུས་རབས་བཅུ་པའི་རྗེས་སུ་བྱུང་འགྲོ་ཞེས་དོགས་སློང་མཛད་ཡོད། གང་ལྟར་སྲོང་བཙན་གྱི་གོང་དེར་བོད་ལ་སྒྲུང་ལྡེའུ་བོན་གསུམ་གྱི་རིག་གཞུང་དང་གདོད་མའི་སྐར་རྩིས་དག་ཀྱང་ཡོད་ཕྱིར། སྲོང་བཙན་གྱི་གོང་དུའང་བོད་ལ་འོད་སྟོང་འབར་བའི་རིག་གཞུང་ཡོད་ཅེས་ལབ་པ་ནི་དོན་དང་མཐུན་པའི་གཏམ་མོ།།
