བྱེད་སྒྲ་ཉིས་བརྩེགས་ལ་དཔྱད་པ།
༄༅།།བྱེད་སྒྲ་ཉིས་བརྩེགས་ལ་དཔྱད་པ།
སྒང་གཤོང་རི་མོ་ཁ་ཁ།
རྩོམ་པ་པོ། གངས་ཆུ་ཐིགས། (རི་བོ་ཆེ)
དེ་ཡང་། བོད་ཀྱི་བརྡ་སྤྲོད་པའི་བསྟན་བཅོས་ཆེན་མོ་སུམ་ཅུ་པ་ལས་བྱེད་སྒྲའི་རྣམ་གཞག་འཆད་ཚེ། ཁ་ཅིག་གིས། སྐབས་ཀྱི་བྱེད་པ་པོ་དང་བྱེད་པ་གཉིས་ཀ་དངོས་སུ་གསལ་བ་ཡིན་ན། དེར་བྱེད་སྒྲ་ཉིས་བརྩེགས་བྱེད་དགོས་ཞེས་མཐའ་གཅིག་ཏུ་ཐག་གཅོད་པ་དང་། ཁ་ཅིག་གིས། བྱེད་པོ་དང་བྱེད་པ་གཉིས་ཀྱི་བར་དུ་འབྲེལ་སྒྲའི་ཕྲད་དང་། བྱེད་པ་རང་ལ་བྱེད་སྒྲའི་ཕྲད་སྦྱར་ཏེ། མདོར་ན་བྱེད་པོ་དང་བྱེད་པ་གཉིས་ཀ་དངོས་སུ་ཡོད་རུང་བྱེད་སྒྲའི་ཕྲད་གཅིག་མ་གཏོགས་མི་དགོས་ཞེས་ཁ་ཚོན་གཅོད་པ་དང་། ཡང་འགའ་ཞིག་གིས། འབྲེལ་སྒྲའི་ཕྲད་གཅིག་དང་བྱེད་སྒྲའི་ཕྲད་གཅིག་སྦྱོར་བའམ། ཡང་ན་བྱེད་སྒྲའི་ཕྲད་ཉིས་བརྩེགས་བྱེད་པ་གཉིས་ཀ་ལ་ཕྱོགས་རེ་རེ་ནས་གོ་བ་རེ་ལེན་རྒྱུ་ཡོད་སྟབས། ཇི་ལྟར་བྱས་ཀྱང་འགལ་བ་མེད་ཅེས་ཟེར་རོ།། དེ་དག་ལས། འདོད་པ་སྔ་མ་གཉིས་ནི་བྱེ་བྲག་མ་ཕྱེས་པར་མཐའ་གང་རུང་ཞིག་ཏུ་ཐག་བཅད་པ་ཡིན་སྟབས། ཕྱོགས་རེ་ནས་འགྲིག་ཀྱང་ཕྱོགས་རེ་ནས་འགལ་བ་ལྟར་སྣང་བ་དང་། འདོད་པ་ཕྱི་མ་དེ་ནི་ཁ་ཁྲལ་འཇལ་བ་ཙམ་ལས་གནད་ལ་དཔྱད་པའི་གཏམ་གཏན་ནས་རེད་མི་འདུག་ལ། གང་ལྟར་དེ་དག་ཐམས་ཅད་ཀྱིས་བྱེད་སྒྲ་ཉིས་བརྩེགས་དགོས་མིན་གྱི་རྒྱུ་མཚན་ཡང་དག་ཅིག་ཞིབ་བཤད་བྱས་མི་འདུག་སྙམ།
(དེ་ལས་མང…)